ກ່ຽວກັບສະຖາບັນ
ຄຳເຫັນຂອງຄະນະສະຖາບັນຄົ້ນຄວ້າວິໄຈການພັດທະນາ
ສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົບຮົມ “DRI” ມີຖານະທຽບເທົ່າກັບກົມໜຶ່ງສັງກັດໃນໂຄງປະກອບກົງຈັກການຈັດຕັ້ງຂອງກະຊວງ ແຜນການ ແລະການລົງທຶນ “MPI”, ມີພາລະບົດບາດເປັນເສນາທິການໃຫ້ແກ່ກະຊວງ ໃນການຄົ້ນຄ້ວາ, ສ້າງຍຸດທະສາດ, ແຜນແມ່ບົດ, ນະໂຍບາຍ ແລະມາດຕະການກ່ຽວກັບການພັດທະນາເສດຖະກິດ-ສັງຄົມລະດັບຊາດ ແລະທ້ອງຖິ່ນ. ດໍາເນີນການຄົ້ນຄວ້າ-ວິໄຈຫົວຂໍ້ຕ່າງໆ ທີ່ຕິດພັນກັບສະພາບການພັດທະນາເສດຖະກິດ-ສັງຄົມໃນແຕ່ລະໄລຍະ ເພື່ອສະໜອງຂໍ້ມູນ ແລະໃຫ້ຄໍາສະເໜີ/ມີຄຳເຫັນ ດ້ານນະໂຍບາຍໃຫ້ແກ່ກະຊວງ ແຜນການ ແລະການລົງທຶນ ເພື່ອພິຈາລະນານໍາສະເໜີຕໍ່ລັດຖະບານ. ຈັດຝຶກອົບຮົມ ແລະຍົກລະດັບຄວາມຮູ້ຄວາມສາມາດທາງດ້ານເຕັກນິກ ແລະວິຊາການຮອບດ້ານໃນວຽກງານຄຸ້ມຄອງເສດຖະກິດ-ແຜນການ ໃຫ້ພະນັກງານຂະແໜງແຜນການ ແລະການລົງທຶນ ໃນການເຄື່ອນໄຫວເຮັດໜ້າທີ່ວຽກງານການຄຸ້ມຄອງເສດຖະກິດ-ແຜນການ ໃນຂອບເຂດທົ່ວປະເທດ ໃນແຕ່ລະໄລຍະ.
DRIT ມີວິໄສທັດໃນການຜັນຂະຫຍາຍ ແລະ ຫັນເອົາແນວທາງຂອງພັກ, ມະຕິ, ຄໍາສັ່ງ ແລະນະໂຍບາຍຂອງລັດຖະບານ ເຂົ້າໃນວຽກງານຄົ້ນຄວ້າດ້ານນະໂຍບາຍການພັດທະນາເສດຖະກິດ-ສັງຄົມ ໃຫ້ເປັນແຜນການ, ແຜນງານ, ໂຄງການອັນລະອຽດ ແລະນໍາສະເໜີຄະນະນໍາ ກະຊວງແຜນການ ແລະການລົງທຶນ; ຕິດຕາມ ແລະປະເມີນສະພາບເສດຖະກິດມະຫາພາກປະຈໍາເດືອນ, ໄຕມາດ ແລະປະຈໍາປີ ເພື່ອນໍາສະເໜີທາງດ້ານນະໂຍບາຍ ແລະມາດຕະການກ່ຽວກັບການຄຸ້ມຄອງ ແລະແກ້ໄຂຄວາມຫຍຸ້ງຍາກທາງດ້ານເສດຖະກິດມະຫາພາກໃນແຕ່ລະໄລຍະ; ປະເມີນການຈັດຕັ້ງປະຕິບັດນະໂຍບາຍການພັດທະນາດ້ານສັງຄົມ, ການພັດທະນາຊົນນະບົດ, ແກ້ໄຂຄວາມທຸກຍາກ ແລະບັນດາຕົວຊີ້ວັດດ້ານສັງຄົມ ແລະຄວາມທຸກຍາກ ເພື່ອສະໜອງຂໍ້ມູນ ແລະສະເໜີຄໍາເຫັນດ້ານນະໂຍບາຍຕໍ່ການສ້າງ ແລະຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ; ສ້າງລະບົບຖານຂໍ້ມູນຂະແໜງເສດຖະກິດ-ສັງຄົມ ເພື່ອຮັບໃຊ້ວຽກງານການຄົ້ນຄວ້າ ແລະເຜີຍແຜ່ບັນດາຜົນຂອງການຄົ້ນຄວ້າ ຕາມການເຫັນດີຂອງຄະນະນໍາກະຊວງ ແຜນການ ແລະການລົງທຶນ ແລະຍົກລະດັບຄວາມຮູ້-ຄວາມສາມາດດ້ານເຕັກນິກ-ວິຊາການຄົ້ນຄວ້າໃຫ້ແກ່ພະນັກງານ-ລັດຖະກອນໃຫ້ກາຍເປັນຄົ້ນຄວ້າທີ່ມີຄຸນນະພາບ.
ສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົບຮົມ ປະກອບມີ 5 ພະແນກຄື
- ພະແນກຄົ້ນຄວ້າສັງລວມ ແລະ ຂໍ້ມູນຂ່າວສານ
- ພະແນກຄົ້ນຄວ້ານະໂຍບາຍເສດຖະກິດ
- ພະແນກຄົ້ນຄວ້ານະໂຍບາຍສັງຄົມ ແລະ ຫຼຸດຜ່ອນຄວາມທຸກຍາກ
- ພະແນກຄົ້ນຄວ້ານະໂຍບາຍພັດທະນາເຂດແຄວ້ນ ແລະ ສິ່ງແວດລ້ອມ
- ພະແນກຝຶກອົບຮົມ
ໂຄງຮ່າງການຈັດຕັ້ງ ສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົບຮົມ
ຄະນະສະຖາບັນ
ພະແນກຄົ້ນຄວ້າສັງລວມ ແລະ ຂໍ້ມູນຂ່າວສານ
ພະແນກຄົ້ນຄວ້ານະໂຍບາຍເສດຖະກິດ
ພະແນກຄົ້ນຄວ້ານະໂຍບາຍສັງຄົມ ແລະ ຫຼຸດຜ່ອນຄວາມທຸກຍາກ
ພະແນກຄົ້ນຄວ້ານະໂຍບາຍພັດທະນາເຂດແຄວ້ນ ແລະ ສິ່ງແວດລ້ອມ
ພະແນກຝຶກອົບຮົມ
