ໃນວັນທີ 19 ມິຖຸນາ 2024 ທີ່ຜ່ານມາ, ສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົບຮົມ, ກະຊວງແຜນການ ແລະ ການລົງທຶນ ໄດ້ຈັດກອງປະຊຸມເຜີຍແຜ່ບົດຄົ້ນຄວ້າໃນ 2 ຫົວຂໍ້ຄື (1) ” ສະພາບການຄ້າຊາຍແດນ ຂອງ ສປປ ລາວ ກໍລະນີສຶກສາ: ແຂວງບໍ່ແກ້ວ, ໄຊຍະບູລີ, ສະຫວັນນະເຂດ ແລະ ຈຳປາສັກ “; ແລະ (2) ນະໂຍບາຍການໂອນເງິນກັບບ້ານຂອງ ສປປ ລາວ ໃນປີ 2022. ນອກຈາກນັ້ນຍັງໄດ້ຮັບຟັງການຈັດເວທີສົນທະນາ ໃນການແລກປ່ຽນບົດຮຽນ, ໃນການຈັດຕັ້ງປະຕິບັດຮ່ວມກັບ 3 ພາກສ່ວນຄື: ທະນາຄານແຫ່ງ ສປປ ລາວ, ສະຖາບັນຄົ້ນຄວ້າອຸດສະຫະກຳ ແລະ ການຄ້າ ແລະ ມະຫາວິທະຍາໄລແຫ່ງຊາດ .

ກອງປະຊຸມໃນຄັ້ງນີ້ ໃຫ້ກຽດການເປັນປະທານໂດຍ ທ່ານ ປອ. ສິດທິຣົດ ຣາຊະພົນ ຫົວໜ້າສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົບຮົມ ເຊິ່ງຈຸດປະສົງຂອງກອງປະຊຸມແມ່ນເພື່ອເຜີຍແຜ່ບົດຄົ້ນຄວ້າ ແລະ ແລກປ່ຽນຄໍາຄິດເຫັນຮ່ວມກັບບັນດາຜູ້ເຂົ້າຮ່ວມກອງປະຊຸມ ເພື່ອຮ່ວມກັນຊອກຫາມາດຕະການແກ້ໄຂ ແລະ ນະໂຍບາຍທີ່ເໝາະສົມ.