ໃນຕອນເຊົ້າຂອງວັນທີ 2 ສິງຫາ 2023 ສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົບຮົມ ໄດ້ຈັດກອງປະຊຸມກໍານົດຂໍ້ແຂ່ງຂັນ-ຍ້ອງຍໍບຸກຄົນ ໂດຍການເປັນປະທານຂອງ ທ່ານ ປອ ສິດທິຣົດ ຣາຊະພົນ, ຫົວໜ້າສະຖາບັນຄົ້ນຄວ້າວິໄຈການພັດທະນາ ແລະສູນຝຶກອົບຮົມ ຈຸດປະສົງຂອງກອງປະຊຸມຄັ້ງນີ້ ກໍ່ເພື່ອເປັນການຢັ້ງຢືນເຖິງການມີສ່ວນຮ່ວມຂອງບຸກຄົນ ໃນການແຂ່ງຂັນປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະ ພັດທະນາປະເທດຊາດ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ພາຍໃຕ້ ຄຳຂວັນ ‘‘ຮັກຊາດ ແລະ ພັດທະນາ’’ ກໍຄືເນື້ອໃນຂໍ້ແຂ່ງຂັນ 5 ປໍ, 4 ຄາດໝາຍ, 3 ສໍ ຮອດປີ 2025 ຂອງ ກະຊວງ ແຜນການ ແລະ ການລົງທຶນ ແລະ ເນື້ອໃນຂໍ້ແຂ່ງຂັນຂອງ ສະຖາບັນຄົ້ນຄວ້າວິໄຈການພັດທະນາ ແລະສູນຝຶກອົບຮົມ ໃຫ້ໄດ້ຮັບການຈັດຕັ້ງປະຕິບັດທີ່ມີຜົນສຳເລັດທາງດ້ານປະລິມານ ແລະ ຄຸນນະພາບ ຕາມລະດັບຄາດໝາຍທີ່ກຳນົດໄວ້.

ເຊິ່ງເນື້ອໃນຂໍ້ແຂ່ງຂັນຂອງສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົບຮົມ ຄື 3 ດີ 4 ພັດທະນາ, ມີລາຍລະອຽດດັ່ງນີ້: 3 ດີ ມີຄື 1)ມີຄວາມສາມັກຄີເປັນປຶກແຜ່ນແໜ້ນຫນາ ແລະ ສະຫງົບປອດໄພດີ. 2)ມີລະບຽບວິໄນ ແລະ ແບບແຜນວິທີເຮັດວຽກທີ່ດີ. 3)ມີບົດຄົ້ນຄວ້າ ແລະ ສະໜອງການຝຶກອົບຮົມທີ່ມີຄຸນນະພາບດີ. 4 ພັດທະນາ ມີຄື 1)ພັດທະນາວຽກງານຄົ້ນຄວ້າ ແລະຝຶກອົບຮົມໃຫ້ກາຍເປັນເສນາທິການທີ່ມີຄຸນນະພາບ. 2)ພັດທະນາກົງຈັກໃຫ້ມີຄວາມເຂັ້ມແຂງ ແລະໜັກແໜ້ນ. 3)ພັດທະນາບຸກຄະລາກອນໃຫ້ກາຍເປັນນັກຄົ້ນຄວ້າທີ່ດີ ແລະ ນັກຝຶກອົບ ຮົມທີ່ເກັ່ງ. ແລະ 4)ພັດທະນາຖານຂໍ້ມູນ, ວິທີວິທະຍາໃນການຄົ້ນຄວ້າ ແລະ ພັດທະນາຫຼັກສູດການຝຶກອົບຮົມໃຫ້ສອດຄ່ອງກັບສະພາບຕົວຈິງ.