ສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົບຮົມ ຮ່ວມກັບອົງການ IOM ໄດ້ຈັດກອງປະຊຸມຝຶກອົບຮົມໃຫ້ຄູຝຶກກ່ຽວກັບການນຳໃຊ້ຊຸດເຄື່ອງມືເກັບກຳຂໍ້ມູນການເຄື່ອນຍ້າຍຖີ່ນຖານຂຶ້ນທີ່ ແຂວງຫຼວງພະບາງ ລະຫວ່າງວັນທີ 17-21 ກໍລະກົດ 2023.
ຈຸດປະສົງຂອງການຝຶກອົບຮົມໃນຄັ້ງນີ້ ແມ່ນເພື່ອເປັນເຄື່ອງມືຊ່ວຍໃຫ້ແກ່ສຳມະນາກອນ ເຊິ່ງເປັນຜູ້ທີ່ມາຈາກພາກສ່ວນທີ່ກ່ຽວຂ້ອງຕ່າງໆ ທີ່ໄດ້ຖືກຮັບມອບໝາຍໃຫ້ເຮັດໜ້າທີ່ ພ້ອມທັງມີຄວາມຮູ້ ແລະ ທັກສະ ທີ່ສາມາດນໍາໃຊ້ສາມຊຸດເຄື່ອງມືເກັບກຳຂໍ້ມູນຜ່ານໂປແກຣມເອັກເຊວ ໃນການເຮັດບົດລາຍງານທີ່ກ່ຽວຂ້ອງກັບສະຖິຕິການເຄື່ອນຍ້າຍຖິ່ນຖານ ສໍາລັບຂໍ້ມູນ ການເຄື່ອນຍ້າຍຖິ່ນຖານ ໄດ້ຢ່າງມີປະສິດທິພາບ. ໃນຕະຫຼອດໄລຍະເວລາຂອງການຝຶກອົບຮົມນີ້, ສຳມະນາກອນທັງໝົດ ຈະໄດ້ຄົ້ນຄວ້າຮຽນຮູ້ກ່ຽວກັບການນໍາໃຊ້ສາມຊຸດເຄື່ອງມືເກັບກໍາຂໍ້ມູນ ໂດຍແຕ່ລະຊຸດເຄື່ອງມື ຈະໄດ້ຮັບການແນະນໍາ, ອະທິບາຍ ແລະ ທົດລອງສາທິດ ເຊິ່ງຈະເປັນການສ້າງຄວາມຮູ້ຄວາມເຂົ້າໃຈ ເຖິງຄຸນລັກສະນະ ແລະ ການເຮັດວຽກຂອງຊຸດເຄື່ອງມືດັ່ງກ່າວນີ້ ໃຫ້ແກ່ສຳມະນາກອນໄດ້ຢ່າງເລິກເຊິ່ງຂຶ້ນຕື່ມ.