ວັນທີ 29 ກໍລະກົດ 2022 ທີ່ຜ່ານມາ, ສະຖາບັນຄົ້ນຄວ້າວິໄຈການພັດທະນາ ກະຊວງ ແຜນການ ແລະ ການລົງທຶນ ຮ່ວມກັບ ທະນາຄານພັດທະນາອາຊີ ປະຈໍາ ສປປ ລາວ (ADB) ຈັດກອງປະຊຸມປຶກສາຫາລືພາຍໃຕ້ຫົວຂໍ້ “ການພັດທະນາຕາມທິດສີຂຽວ, ຍືນຍົງ ແລະ ທົນທານຕໍ່ການປ່ຽນແປງດິນຟ້າອາກາດ” ໂດຍການເປັນປະທານຂອງ ທ່ານ ປອ ສິດທິຣົດ ຣາຊະພົນ ຫົວໜ້າສະຖາບັນຄົ້ນຄວ້າວິໄຈການພັດທະນາ.

ຈຸດປະສົງແມ່ນເພື່ອລະດົມແນວຄວາມຄິດເຂົ້າໃສ່ກອບແຜນວຽກທີ່ໄດ້ກໍານົດ ແລະ ຮັບຮອງໃນກອງປະຊຸມໂຕະມົນລະດັບສູງຄັ້ງທີ XIII ຜ່ານມາໃນປີ 2021. ກອງປະຊຸມໃນຄັ້ງນີ້ຈະເປັນການປະຊຸມລະດົມແນວຄວາມຄິດໃນຫົວຂໍ້ທີ່ 5 ກ່ຽວກັບການພັດທະນາສີຂຽວ, ຢືນຍົງ ແລະ ທົນທານຕໍ່ການປ່ຽນແປງດິນຟ້າອາກາດເພື່ອປະກອບເຂົ້າໃສ່ຮ່າງບົດຟື້ນຟູເສດຖະກິດຂອງ ສປປ ລາວ