ສປປ ລາວ ເຊິ່ງເປັນໜຶ່ງໃນປະເທດທີ່ມີການເຕີບໃຫຍ່ຂອງປະຊາກອນໜຸ່ມທີ່ໄວທີ່ສຸດ ໃນອາຊີອາຄະເນ ທີ່ກໍາລັງມີການປ່ຽນເເປງສັດສ່ວນ ການຂະຫຍາຍຕົວຂອງປະຊາກອນ. ຈໍານວນປະຊາກອນຜູ້ອອກເເຮງງານ (ອາຍຸ 20-64 ປີ) ທີ່ເປັນຜູ້ເສຍພາສີ ເເລະ ປະກອບສ່ວນເຂັ້າໃນການພັດທະນາເສດຖະກິດ ໄດ້ມີການຂະຫຍາຍຕົວເພີ່ມຂື້ນຫຼາຍກວ່າເອົາຈໍານວນປະຊາກອນຜູ້ເອື່ອຍອີງເເຮງງານ(ອາຍຸ 0-19 ປີ ເເລະ ອາຍຸ 65 ປີຂື້ນໄປ) ທີ່ເປັນຕ້ອງໄດ້ອາໄສການເບິ່ງເເຍງດູເເລ ເເລະ ການບໍລິການອື່ນໆ.

ສະນັ້ນ, ກາລະໂອກາດທີ່ສໍາຄັນໃຫ້ກັບ ສປປ ລາວ ໃນການຫັນເອົາການຂະຫຍາຍຕົວຂອງປະຊາກອນດັ່ງກ່າວໃຫ້ເປັນກາລະໂອກາດໃນການປັນຜົນດ້ານປະຊາກອນ ສິ່ງດັ່ງກ່າວສາມາດເປັນໄປໄດ້ຫາກເມື່ອປະຊາກອນໃນໄວເເຮງງານ ມີສຸຂະພາບທີເເຂງເເຮງ, ມີການສຶກສາ, ມີອາຊີບທີ່ໝັ້ນຄົງ ເເລະ ເຕັມໄປດ້ວຍກາລະໂອກາດ ຮ່ວມໃນການຕັດສິນໃຈບັນຫາສໍາຄັນທີ່ມີຜົນກະທົບຕໍ່ກັບການດໍາລົງຊີວິດຂອງພວກເຂົາ. ເຊິ່ງຈະເເມ່ນຮຸ່ນພວກເຂົາ ທີ່ນັບເເຕ່ນີ້ຕໍ່ໄປ ທີ່ຈະເປັນຜູ້ຜັກດັນການຂະຫຍາຍຕົວຂອງເສດຖະກິດ ເເລະ ປະກອບສ່ວນເຂົ້າໃນການພັດທະນາເເບບຍືນຍົງ.

ບົດລາຍງານ ການພັດທະນາຊັບພະຍາກອນມະນຸດເເຫ່ງຊາດ ໄດ້ຄົ້ນຄວ້າກ່ຽວກັບສະພາວະຂອງຊາວໜຸ່ມຂອງ ສປປ ລາວ ໃນປັດຈຸບັນ ບໍ່ວ່າຈະກ່ຽວກັບບັນຫາສິ່ງທ້າທາຍທີ່ພວກເຂົາພົບພໍ້, ບັນດາກາລະໂອກາດທີ່ພວກເຂົາມີ ເເລະ ຄວາມມຸ່ງມາດປາຖະໜາທີ່ພວກເຂົາມີຕໍ່ອະນາຄົດຂອງພວກເຂົາ. ບົດລາຍງານໄດ້ເກັບກໍາເອົາສະພາບການດໍາລົງຊີວິດຂອງໄວໜຸ່ມໃນ ສປປ ລາວ ເຊິ່ງລວມເອົາທັງບັນດາໄວໜຸ່ມທີ່ເປັນກຸ່ມຄົນດ້ອຍໂອກາດ ເຊັ່ນ ໄວໜຸ່ມຍິງ, ໄວໜຸ່ມຍິງທີ່ມີຄວາມພິການ, ເເຮງງານເຄື່ອນຍ້າຍໄວໜຸ່ມ, ໄວໜຸ່ມຊົນເຜົ່າກູ່ມນ້ອຍ, ໄວໜຸ່ມໃນກຸ່ມຄົນທີ່ມີຄວາມຫຼາກຫຼາຍທາງເພດ ເເລະ ໄວໜຸ່ມທີ່ມາຈາກເຂດຊົນນະບົດ ເເລະ ຫ່າງໄກຊອກຫຼີກ. ເຊິ່ງຜ່ານເນື້ອໃນຜົນການສໍາຫຼວດຂອງບົດລາຍງານ ໄດ້ໃຫ້ຂໍ້ເເນະນໍາທີ່ສໍາຄັນຕໍ່ເເຕ່ລ່ະຂົງເຂດເຊັ່ນ: ການຈ້າງງານ, ການສຶກສາ, ສຸຂະພາບ ເເລະ ການມີສ່ວນຮ່ວມໃນການ ຕັດສິນໃຈວຽກງານສໍາຄັນ ເຊິ່ງມີຈຸດປະສົງ ໃນການສົ່ງເສີມບົດບາດຂອງໄວໜຸ່ມ ທີ່ເປັນຜູ້ກະຕຸກຊຸກຍູ້ອັນສໍາຄັນໃນການພັດທະນາການພັດທະນາເເບບຍືນຍົງ.

ໃນການເປີດຕົວບົດລາຍງານຄັ້ງນີ້ ເເມ່ນຮ່ວມເປັນປະທານງານໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີກະຊວງແຜນການ ເເລະ ການລົງທຶນ ເເລະ ທ່ານ ນ ຣິຄາດ້າ ຣີເກີ້ ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ພ້ອມດ້ວຍ ຄູ່ຮ່ວມປຶກສາຫາລືຢ່າງກວ້າງຂວາງ ລວມມີ ຊາວໜຸ່ມ, ລັດຖະບານ, ບັນໜ່ວຍງານຂອງອົງການ ສະຫະປະຊາຊາດ, ຄູ່ຮ່ວມພັດທະນາ ເເລະ ບັນດາອົງການຈັດຕັ້ງສັງຄົມ. ເຊີ່ງລວມເອົາໄວໜຸ່ມຫຼາຍກວ່າ 7,000 ຄົນ ໄດ້ປະກອບສ່ວນໃນບົດສໍາຫຼວດເເຫ່ງຊາດ ເເລະ ການປຶກສາຫາລືໃນຄັ້ງນີ້.

ທ່ານ ດຣ ສະຖາບັນດິດ ອິນສີຊຽງໃໝ່ ໄດ້ກ່າວການເປີດງານວ່າ: “ບົດລາຍງານໄດ້ສ່ອງເເສງໃຫ້ເຫັນເຖິງ ຄວາມເອົາໃຈໃສ່ຂອງ ລັດຖະບານໃນການສົ່ງເສີມໄວໜຸ່ມ ເເລະ ເນັ້ນໜັກໃສ່ບັນຫາທີ່ສໍາຄັນ ເເລະ ຮີບດ່ວນສໍາລັບພວກເຮົາສ້າງຄວາມເຂັ້ມເເຂງການລົງທຶນຕໍ່ໄວໜຸ່ມ ເພື່ອພັດທະນາໃຫ້ເກີດການປັນຜົນດ້ານປະຊາກອນ. ບົດລາຍງານຊຸດນີ້ໄດ້ໃຫ້ຄໍາເເນະນໍາທີ່ຊັດເຈນ ທີ່ຮຽກຮ້ອງໃຫ້ມີຄູ່ຮ່ວມພັດທະນາທີ່ເຂັ້ມເເຂງ ໃນຊ່ວງໄລຍະທົດສະວັດທີ່ກໍາລັງຈະມາເຖິງນີ້ ເພື່ອສາມາດບັນລຸເປົ້າໝາຍບູລິມະສິດທີ່ສໍາຄັນຂອງ ສປປ ລາວ ຕາມເເຜນພັດທະນາເສດຖະກິດ-ສັງຄົມເເຫ່ງຊາດຄັ້ງທີ 9.”